Taur ho PLP ba halo kampanya dehan Maun Bot Kayrala Xanana sei suporta nia ba PM iha VII governu konstitusional. Hatan ba ida ne Maun Bot Xanana dehan nia (Taur) "bulak".
Estratejia ne atu lohi povu dehan, primeiru, Xanana iha relasaun diak ho Taur, segundu, Xanana sei suporta Taur atu lidera governu. Durante ne Taur ho PLP mesak mak espalha informasaun ida ne iha Xanana nia kotuk.
Ikus mai jornalista sira husu Xanana se nia (Xanana) suporta duni Taur ka lae. Xanana responde katak ne Taur mehi deit. Primeiru tanba Xanana mak primeiru iha lista CNRT nian ne duni Taur nia steitementu katak laiha lider ida mak sei asumi kargu PM husi CNRT ne bosok.
Tuir fali Xanana hatete momos deit katak nia kontinia la simu Taur bolu nia Suharto.
Bainhira jornalista sira husu kona ba ninia relasaun ho Taur, Xanana refere fila fali ba polemika Taur bolu nia Suharto. Ho piadas oioin Xanana dehan katak hanesan Suharto, nia labele hasoru ho jeneral bot sira.
Kona ba Taur nia steitementu katak Xanana sei apoia nia ba kargu PM, Xanana desmente kedas. Xanana dehan, "uluk hau apoia nia sai presidente, nia bolu hau Suharto. Agora hau nia apoia nia sai primeiru ministru, nia atu bolu tan hau saida?"
Xanana hatutan tan katak nia laos Taur nia maun tanba nia Suharto.
Durante entrevista ne Xanana refere ba Taur ho liafuan "boatamak", nebe hanesan desrespeitu bot ba ema nebe kaer ona kargu hanesan komandante FALINTIL, komandante F-FDTL, ikus mai presidente da republika.
Xanana nia relasaun atual ho Taur ita hare momos kedas durante entrevista ne. Kompanheiru da luta nebe hamutuk iha ailaran iha tinan barak, ikus mai fahe malu tanba deit alin nia arogansia hodi bolu maun, Suharto.
Ba ema nebe mak dedika nia vida ba liuta kontra Suharto, ate ajuda tan povu Indonesia hodi hatun Suharto, bainhira xefe estadu mak dehan fali nia Suharto, ne sei halo nia laran moras makas. At liu tan mak xefe estadu ne hanesan nia alin be nia hakiak husi kik to sai presidente.
Nune Xanana nia mensajen ne mos hakarak hatudu ba ema hotu, liu liu ba Sr. Taur Matan Ruak, katak lori nia (Xanana) mak Taur sai netik ema ruma. Ho goza, piadas no desrespeita, Xanana aviza Taur atu hatene nia fatin.
Husi ne ba oin, se Taur iha moe karik, nia lalika temi tan Xanana nia naran ka bolu Xanana maun. Agora Taur nia maun laiha ona tanba Taur rasik tenta sama nia maun nia ulun.
Husi ne ba oin, se Taur sei iha respeitu ituan ba nia maun Xanana, Taur presiza halo reflesaun ida profunda no komesa pratika ituan humildade.
Sai ona presidente ne pontu altu iha ninia kareira, tanba nia sai ona aman ba nasaun, hetan ona respeitu husi nasaun tomak. Maibe Taur tenki hatene nia fatin se nia konsidera nia an Xanana nia alin. Alin sira tenki nafatin respeita maun sira, biar nia konsidera maun sira beik, kiak, fraku, ka politikamente inferior. Se lae Taur nia legadu tomak sei kose tun ba rai.
Sem comentários:
Enviar um comentário