Tansa susar halakon LPV? Husu ba Dona Isabel Ferreira

Kopi-paste husi blog Politika Timor

PLP KONTRA PENSAUN VITALISIA, XANANA: SRA. ISABEL LA KONTRA!

Manufahi, 23 Junu 2017

Partidu Libertasaun Popular nia tópiku prinsipál ida ba kampaña eleisaun parlamentár 2017 maka Lei Pensaun Vitalisia. PLP kontra lei pensaun vitalisia tanba konsidera la justu no sei fó pezu ba orsamentu estadu tinan-tinan.  

Tuir observasaun mídia ida ne’e nian hatudu katak iha komísiu PLP ne’ebé Prezidente PLP hato’o sempre toka kona-ba LPV, inklui ekipa susesu PLP nian iha mídia sosiál mós lansa issue LPV nudár matéria kampaña atu hatún partidu sira hanesan CNRT, FRETILIN, PD no F. MUDANSA.

Aléinde atu hatún partidu sira seluk ne’ebé aprova Lei Pensaun Vitalisia, ekipa susesu PLP nian mós uza issue LPV atu dada votante sira.

Relasiona ho issue LPV ne’e, Prezidente Partidu CNRT responde katak Lei Pensaun Vitalisia ne’e PLP maka kontra maibé Sra. Isabel Ferreira nudár eis primeira dama la kontra.

“Sra. Isabel nudár sekretária ba NGO ida ne’ebé nia lidera husi kotuk husu ba Governu kona-ba osan vitalisia hira maka sei hetan, tanba dehan nia atu uza osan refere ba suporta atividade NGO ida.” Deklara Prezidente CNRT Xanana Gusmao.

Xanana Gusmao kestiona: “pergunta maka ne’e, se koalia kontra Pensaun Vitalisia tanba sá maka husi kotuk ezije fali osan? Se Sra. Isabel servisu duni iha NGO tanba sá presiza fali kompensasaun husi fundus pensaun?”

Tanba ne’e tuir Prezidente CNRT ne’e katak PLP nia ema rasik maka kontra fali polítika Partidu Libertasaun Popular nian kona-ba Lei Pensaun Vitalisia.

“Nudar Taur Matan Ruak nia kaben, atus Sra. Isabel nian ne’e sera que la kontradís ho sira nia polítika?” Xanana Gusmao konklui ho pergunta.

Tuir oráriu kampaña nian Partidu CNRT sei hala’o kampaña tuir mai iha Postu Administrativu Maubisse, enkuantu PLP sei hala’o kampaña iha Munisipiu Manufahi, Postu Administrativu Same villa.

*red-ll-end*