TMR LA UKUN SEI MOSU FUNU, XANANA: ATU FUNU HO SE?
Ainaro, 22 Junu 2017
Durante kampaña polítika iha Munisipiu Ainaro, militante CNRT levanta kestaun kona-ba ekipa PLP ne’ebé oras ne’e tama sai uma halo propaganda katak bainhira TMR la kaer ukun maka sei mosu tan funu iha Timor-Leste.
Tuir militante CNRT ne’e katak ekipa PLP nian tama sai hodi dehan katak TMR nudár jenerál durante tinan 24 iha ai laran to’o ona tempu atu nia maka kaer fali ukun iha rai Timor ne’e.
Militante Manuel Araujo husu pergunta ba Prezidente P. CNRT nune’e: “Agora ekipa Maun Taur nian tama sai bairu dehan katak se Maun Taur la sai Primeiru Ministru entaun sei mosu tan funu iha Timor tanba nia maka uluk jenerál tinan 24 iha ai laran ne’e duni Maun Taur tenke sai Primeiru Ministru, ida ne’e halo ami militante sira ta’uk no preokupa, oinsá Maun Bot nia resposta ba situasaun ida ne’e?”
Hatán ba preokupasaun ida ne’e Prezidente P.CNRT Xanana Gusmao hateten katak Taur Matan Ruak funu maka tinan 24, la’ós jenerál maka tinan 24.
“Se Taur dehan nia jenerál tinan 24 iha ai-laran entaun durante ne’ebá estratéjia saida maka nia halo?, ita labele haluha katak ita duni sai Indonézia la’ós ho kilat maibé ho polítika.”Xanana Gusmao responde ba militante sira.
Xanana Gusmao haktuir tan katak hafoin ukun an maka Taur Matan Ruak sai jenerál iha F-FDTL nian laran. Xanana Gusmao hatutan: “Iha tempu ukun an Taur Matan Ruak sai jenerál halo polítika bot tebes hodi duni sai tiha Forsas Militar hamutuk um tersus membros, ida ne’e akontesimentu úniku iha ASIA, ikus mai CNRT maka tenke rezolve, ne’ebé hatene an ba, tau dirilah.”
Entretantu responde ba povu Ainaro nia preokupasaun kona-ba sei mosu funu se karik Taur Matan Ruak la kaer ukun, Xanana Gusmao fó garantia katak sei la iha funu. Prezidente Partidu CNRT ne’ebé iha tempu rezisténsia asume kargu nudár Komandante Supremu FALINTIL husu ba povu atu hakmatek no husu ba Taur Matan Ruak atu konsidera preokupasaun povu nian ida ne’e.
“Jeneral Taur Matan Ruak favor hare to’ok ba, atu funu tan ho se? Povu terus barak los ona.” Hameno Xanana Gusmao hodi remata diskusaun ho militante sira.
Tuir oráriu kampaña nian, Partidu CNRT sei hala’o kampaña iha munisipiu Manufahi no liubá Maubisse. Tuir observasaun mídia ida ne’e nian, kampaña CNRT nian la’o ho hakmatek no hetan partisipasaun másimu husi militante CNRT nian husi postu administrativu sira iha Munisipiu Ainaro, menus husi postu administrativu Maubisse.
*red-ll-end*
Sem comentários:
Enviar um comentário