Politika maun alin hili malu halo Taur Matan At

Eis Presidente Taur mos konfia matemean katak nia "maun" Xanana sei entrega pasta Primeiru Ministro ba nia bele nia ho PLP manan iha eleisaun ka lakon.

Tuir blog Timor Agora, Taur dehan "Xanana dehan ona mai hau, sei laiha lideransa CNRT maka sai PM 2017". Taur garante ba ninia adeptu sira maske "partidu CNRT maka sei manan iha eleisaun parlamentar 2017 mai, maibe sei lai iha lidernsa husi CNRT maka sei sai Primeiru Ministru tamba Maun Xanana planeia tiha ona hodi  fo knar xefe governu ba nian alin maka Taur Matan Ruak."

Primeiru, Taur hatudu ona katak nia laos ema ida nebe kaer ba prinsipiu democraticos. Taur halo konfuzaun nafatin entre luta armada ba independensia ho konstrusaun estadu modernu. Evidentemente katak Taur pertense ba tempu luta armada nian. Nia laiha kapasidade atu kontribui ba konstrusaun nasaun demokratika enkuantu nia hili dalan "maun fo alin" atu manan poder. Iha nasaun demokratiku, povu mak hili, laos maun sira mak hili.

Politika hili malu mos mak hamosu KKN. Tanba maun fo ba alin sein iha prosesu ida legal, transparente, no demokratiku, sei laiha akuntabilidade ba ema ida. Alina iha deit akuntabilidade ba maun. Alin naok, maun mak responsabiliza. Dala barak maun taka matan deit tanba ne nia alin mak naok.

Taur nia konfiansa ba Xanana ne hanesan Taur nia mehi loromanas. Taur halo eror bot ida kuandu nia dehan Xanana (ho Alkatiri) ho Suharto hanesan deit. Xanana luta tinan 24 iha ailaran depois iha prizaun kontra Suharto. Xanana mos kontribui ba hamonu Suharto hodi lori demokrasia ba Indonsia. Taur ho ninia arrogancia atu hetan lalais poder nega hotu Xanana nia kontribuisaun ba luta ba ukun rasik an bainhira nia kompara Xanana ho Suharto. Xanana nia laran moras tebes tanba ema ida nebe nia konfia, ema ida nebe nia ajuda hodi manan kadeira presidente, ema ida nebe nia mentor to sai bot, fila sunu fali nia. Xanana nia konfiansa ba Taur laiha ona.

Xanana mos iha alin barak, nebe nia iha liu konfiansa. Nia alin ida mak Rui Araujo nebe agora kaer kargu PM. Nia alin ida tan mak Lu Olo, nebe agora presidente. Nia alin seluk mak Francisco Kalbuady, sekretario geral CNRT. Nia alin sira seluk agor sae daudauk tan iha CNRT, iha FRETILIN, iha sektor privado, iha fatin barbarak. Alin Taur agora maun laiha ona.CK

--