Politica ne'e arte ida ema halo negocio

Politica ne arte ida duni. O bele dehan Xanana hanesan Suharto mais empre iha posibilidade Xanana konvida nafatin o ba tur iha kadeira hanesan Ivo Mateus esplika:

Autoria: Ivo Mateus Gonçalves

Hau la compriende dehan 'politika ida tabele malu ne'e.'

Maun TMR, sai Presidente mas sem partidu. Se maka dudu no suporta nia sai Presidente? Xanana Gusmao. Ne'e mos ba segunda volta maka foin ganha vitoria. Se Maun TMR maka iha partidu rasik iha tempo ne'e ba karik, hau fiar nia bele manan iha primeira volta.

Doutor Rui Araújo, sai PM. Karik nia tabele ba Xanana Gusmao ba cargo refere? Hau sente lae, maibe liu husi konsensu politiku ida katak konstrusaun de estado ne'e mas importante liu interese pesoal no grupu. So ema hanoin luan maka bele hanoin to'o iha ne'e ba. 

Mas to'o ikus ema fo salah ba Fretilin. 'Balun dehan lakon ona mos moe laiha, ema bolu ba nafatin.' Hau sente hirak ne'e be koalia hanesan ne'e, sira la hatene saida maka arte husi negosiasaun politika.
Hau sente Doutor Rui Rui Araújo no Fretilin 'la tanis' ba cargo ida PM ne'e.

ZEESM ne'e be lidera husi Secertario Geral Fretilin mos, la ses husi kritika. Balun hare liu ba oinsa bo'ot sira fahe poder no riku-soin ba malun. Balun fali dehan 'kritika-kriitika to'o la bele deit, entaun tenke monu ain para hetan netik doci pedasuk ruma.'

Dala ida tan, ita minimiza ita nia kapasidade de analiza, e redus buat bo'ot ida sai buat la vale.
Haluha tia dezenvolvimento fizico hirak ne'e be agora acontece dadaun iha Oecusse. Ponte ne'e be cria hodi hametin ligasaun populasaun husi fatin ida ba fatin seluk. Irigasaun nudar meios hodi aumenta produsaun agricultura, eletrisidade no buat seluk tan. Povo preciza maka nesesidade bazico, laos andar rua nulu.

Minimiza buat ne'e be bo'ot sai buat ida que la vale tamba deit ita nia tendencia politika, hakarak hatudu deit katak ita laiha capasidade suficiente hodi bele responde realidade politika ohin loron.

Presidente Lu-Olo, PR atual. Xanana Gusmao maka suporta, ne'e los. Laiha ema ida maka nega ida ne'e. Mas keta haluha katak Lu-Olo mos iha nia partidu rasik, tamba ne'e maka ho suporta husi Xanana Gusmao+CNRT, Lu-Olo manan iha primeira volta.

Balun interpreta suporta politica ida ne'e ho argumento oin-oin. 'So Xanana deit maka bele lori Lu ba Presidente.' Dala ida tan, haluha tia konsensu iha politica. Se Lu-Olo ho Fretilin preciza Xanana, iha parte hanesan politicamente Xanana mos preciza Lu-Olo ho Fretilin.

Hanesan mos Maun Xanana konvida PD no FM hodi hari AMP. Simples.

Jokowi atu sai Presidente Indonesia, nia tenke hakbesik a'an ba WIranto, Surya Paloh, no Sutiyoso. Halo konsensu ho sira para bele asegura cargo Presdente Republica.

Se tabele se? Politica ne'e iha nia arte rasik. Laiha lia fuan 'tabele ba malun iha politica.'

Se karik hanesan Maun TMR dehan 'Maun Xanana nia alin iha Timor ne'e maka nia deit ona, laiha tan seluk.' Ida ne'e mos karik meios de aproximasaun ida, para CNRT keta ho laran luak nomeia Maun TMR sai nudar PM. Se maka hatene?

Uluk Xanana Gusmao maka dudu nia ba Presidente da Republica. Agora mos nia 'hakarak Maun Xanana maka dudu nia'--dala ida tan--atu sai PM.

Agora, ida ne'e ita atu bolu 'Mau-Tabele.'?

Politica ne'e arte ida ema halo negocio, oinsa ita bele convense ita nia adversario para atu bele apar no mos aceita--mesmo laos buat hotu--ba ita nia prinisipio. Dala ruma ita tenke sacrifica ita nia interese pesoal para hodi bele akumula adversario nia interese.

Iha politica ne'e ita la bele manan hotu, maibe naran katak ita mos la bele lakon hotu.

Abraco