Ita tenki koalia kona ba Sr. Taur Matan Ruak nia uma iha Metiaut

Imi hatene hau hela iha nebe? Palacio Metiaut.

Ita presija kolia kona ba eis Presidente Taur Matan Ruak nia uma. Nia Palacio. Nia uma mutin bot iha Metiaut. Tamba sa labele?

Iha Dili laran eis guerillheiro ida nebe mak iha uma bot no rikeja hanesan Sr. Taur nia uma? Se tan mak iha Dili iha uma bot hanesan Taur? Maun Xanana? Maun Lu? Sr. Jorge Serano? Sr. Nilton Gusmao? Oscar Lima? Lae. Laiha ema ida.

Tanba ne mak ita persija kolia kona ba Sr. Taur Matan Ruak nia uma. Se Sr. Taur ema babain ida karik ne oinseluk. Maibe tamba Sr. Taur ex presidente no iha potensia bot atu kaer VII governo constitusional, ita presija kolia duni.

Sr. Taur Matan Ruak kolia atu fahe rikeja hanesan, fahe oportunidade hanesa. Nia kontra LPV. Nia hakarak halakon korupsaun. Nia kontra privilegio bobot ba lider sira. Nia kontra hotu kedas. Nia hakarak hisik kosar, katak tenki servisu mak bele hetan moris diak. Maibe Sr. Taur mos hisik kosar ka lae?

Belun sira. Sr. Taur nia uma ne bot duni. Uma ne bot duni mak husi Atauro mos ita bele hare hetan.

Iha sirkulu mean ne mak Taur nia uma hateke husi. Sr. Taur nia uma mutin iha rai leten ita hare mos los. Bainhira ita halo zoom in ba foto ne ita bele hare mos liu tan uma ne.

Uainhira ita tama Dili ho ro Sr. Taur nia uma mak dada liu ita nia matan. Uma mutin, bot, furak, iha foho leten, hateke mai kapital Timor-Leste, hanesan Liurai Bot hateke ba nia reinu. Sr. Taur baibain dehan nia ne ema kiak. Lohi karik.......... Ema kiak ida bele iha uma hanesan fali Palacio?

Tansa imi husu, ita tenki koalia kona ba Taur nia uma? Tanba Taur sempre hatudu an nudar ema ida humilde, ema ida honesto, servisu nain, laran mos, hakarak dezenvolve Timor-Leste, hisik kosar ba povu nia moris diak.

Karik ho uma luxu ne Sr. Taur hakarak fo ijemplu ba povu sira, se Taur bele, imi mos bele?

Tansa o labele? Taur hatudu ona dalan katak iha Timor-Leste buat hotu posivel. Se o hakarak halo uma ida bot liu Palacio Nobre iha rai ida ne o mos bele. Hisik kosar ba moris diak, bele hela.

Taur servisu makas. Tan ne mak iha tinan 5 nia laran nia bele rai osan naton hodi halo uma bot ida hanesan ne. Iha tinan 2015 nia sei hela deit iha tenda okos uainhira nia hisik tiha kosar husi F-FDTL hodi buka moris hanesan sivil.

Iha Bucoli, Taur deklara katak nia ema kiak maski funu 24 anos iha ailaran. Estadu atu fo uma ba nia, nia dehan nia moe atu simu. Nia ho nia fen hakarak dada lona deit. Se labele, entaun ba aluga.

Taur koalia hanesan mnia ema nebe buat ida laiha. Karik los tanba hanesan komandante F-FDTL nia salariu kik oan hela atu iha uma ida naton? Nia dehan jeneral ida beik liu mak nia. Funu tinan 24 nia laran para ikus mai buar ida laiha. Fitun ida deit inkuantu ema seluk hetan fitun 4. Tebes duni ka?

Iha minutu 1:20 iha video ne Taur deklara ba publiku katak nia uma laiha. "Hau dehan hau nia ferik oan. Dada tenda! Se laiha (tenda), aluga," tenik Taur Matan Ruak ba ema hotu rona iha Bucoli, Baucau.

Iha 2015 Sr. Taur dehan nia uma laiha. Iha 2017 Sr. Taur Matan Ruak ex presidente, ex paunlima F-FDTL, hela iha Palacio Metiaut. Tan ne mak ita tenki koalia hodi husu, osan halo uma bot ne mai los husi nebe?

Taur hisik kosar makas ba moris diak. Se tan mak lakohi tuir Taur nia dalan? Maibe dalan ida nebe nian lai. Tan ne mak ita tenki husu liuliu tamba Sr. Taur iha potensia atu kaer governu nudar PM.

Ida ne ita sedauk kolia tan kona ba privilegio sira nebe nia hetan. Estado loke estrada to nia uma no taka ho alkatraun. Dada elektrik to nia uma. Ne privilegio bot ne. Kusta estadu osan hira? Sr. Taur kolia kona ba privilgio ba deputado sira no ba ministro sira. Tambasa Sr. Taur la koalia kona ba privilegio nebe nia rasik hetan? Tanba sa mak Sr. Taur la husu estadu halo uluk estrada ba komondade sira iha suku Metiatu antis husu privlegio ba nia? Hetok Sr. Taur hatudu liman ba ema maibe liman fuan hat se fali ba nia an.

Ita mos sidauk kolia kona ba Dona Isabel Fereira ex primera dama nia kontratu ho estado atu sai asesora. Iha kontratu balu lorloron Dona Isabel asina deit absensi maibe la marka prejensa maibe ba halo fali kampanya ba ministru balun nebe fo kontratu ba nia. Karik Dr. Aderito Soares ex comisario CAC bele espilka? Ida ne sei iha posting ida seluk :) (CKB)